yang semacam atu bah

Yang banarnya malasku pulang kan bangun tadi pagi atu, ganya pasal sekulah, paksa jua kan? Macam biasalah, mandi lapas atu breakfast. Sekalinya awal banar betulak ari ani, dalam pukul 6.25 cematu, jalan inda jam so awal sampai di sekulah.

Registration macam biasa, sekalinya ada tia si Azman palak-palak arah pintu mengambar orang, veining sekali-skala posing lah kan. Lapas atu ke kelasnya and sambung mengambar-gambar. Siok lah pasal starting ari ani macam siok semacam.

Lapas registration, ke Geo arah girl’s Hostel. Baru jua ku masuk ke dalam kelas atu ada tia si Wina membaritau Si Najib ada menunggu di bawah. Pikir apa, rupanya kan minta DVD “Runaway Jury” yang ku minjam dari teacher Malai dimalam, kebeliangan ku pulang, lalah tarus turun naik ganya ani. Belajar macam biasa, memaloi sikit-sikit den 8.30 tia.

Bejalan ke GP(indakan berunggau nya?). pikir aher tah sudah kami atu, baik jua sampat sebelum dorang stat meliat cerita “Runaway Jury” atu. Since aku minjam dah dimalam, inda ku berapa concentrate meliat so ngantuk lah. Kan tidur tapi macam hawar jua. In the end, meliat jua sampai abis.

Maths boring hantap nyanta, cigu nada so main gitar and menyanyi-nyanyi dengan si Hadi. Macam-macam lagu timbul, lagu lama ada, lagu baru ada, sabut saja tia, ada kali kami nyanyi tu :D dorang di belakang belajar cara kan memakai tie. Yang ku ingat ada si Najib, Mijan, Reza, Amir, Naqiu, Azman sama si Cris. Atu yang ku ingat tu, yang ku inda ingat sory ler~ awu ah, ada si Raziqin jua, birthday nya ari ani, iatah kali ia hang-out dengan kami atu, kalau inda, pasal ia inda bedangan.

Awalku keluar untuk break pasal lapar, cigu inda jua ada so beapa tah kan menunggu batah-batah. Makan breakfast, cerita-cerita dengan si Ramzul. Si Nash datang tadi tapi macam nada orang ingau ia ada atau inda, ‘ignored~’

Lapas tukar baju karate, pasal batah-batah becerita, aher pulang kami stat. at least si Lisya inda buang stress arah kami lagi macam minggu lapas tapi sangal jua masih kaki bah pasal training nya. sensei datang aher sikit. Sampat ia meliat kami training kajap, ketara jua tu sorang-sorang inda semangat(maybe aku sorang ja yang inda).
Masa break sensei betanya siapa kan grading. Ani kira lastlah sebelum puasa. Banarnya aku mau pulang, macam jeles ku jua kan meliat junior ku satu-satu naik sudah ani wah, tapi macam malas jua, maybe taun dapan kan beranti karate ku, last year lah katakan, mau jua kan try CCA lain, ani betaun-taun dah ku karate, except for time form 3 ikut pool, pasal nada orang membawa tu nya(banarnya kan ikut dah tu, inda tia kana suruh~)

Lapas break, practice Kata, macam biasa ja, yang salah di luruskan bla bla bla. Ajar red belt (and orange) yang baru cara kan buat syotoiki (luruskah tu?) tapi either dorang inda paham or aku ani yang nda pandai mengajar.

Lunch time, paksa skip Chem kos ada yang perkara yang lebih penting, TEST UNDANG-UNDANG!!! Sepatutnya balik dalam pukul 12.30 but paham-paham ja orang Brunei ani, di bagitau pukul 12.30, pukul 1.00 baru tia datang. Baik jua ampir tampat makan lunch ani, atupun abis lunch kan pukul 1.30. kana suruh datang pukul 1.30 tapi lapas betukar baju apa, kan pukul 2.00 jua datang, kan stat periksa lagi tu.

Maybe aku atu luan nervous, lupa tia ku barang yang paling penting, PEN!!! Baik jua my dad alum bejalan, sampat jua minjam pennya. Ngam pukul 2.00, nervous sudah ni tapi alum jua datang-datangnya pegawai pemeriksa ani. 2.10 barutah ia ada mebuka pintu bilik periksa, orang Brunei tah ko banar.

Sepatutnya kana gitau pukul 2.00 atu, statlah kan periksanya ani, rupanya ada tia lagi process mendaftar, in the end 2.40 kali barutah kana bagi kratas soalan. Baik jua inda kana yang 60 soalan atu. Kes untung jualah aku atu, kratas soalan ku ada tanda-tanda (inda pulang clear banar) jawapannya. Macam kana bulatkan bah jawapannya atu. Atu yang sanang, sekalinya yang payah-payah atu inda tia betanda. Mun ku kan mencari tandanya atu macam obvious jua kan, flash kan soalan atu arah lampung.

Pikir lapas siap menjawab ani dapat tah balik tarus, ada tia lagi taklimat/briefing pasal mengambil periksa undang-undang ani. Pasal periksa di jalan tia, pasal lessen sementara tia etc. beguna lah tip-tip yang kana bagi ani. Bila abis, turunlah ni kebawah, ijap kana marahi pasal lambat keluar, rupanya alum tia jua ada kerita ani.

Lapas menelipun minta ambil, menunggu lah ni dapan pintu. Siok jua meliat orang yang kana periksa di jalan ani, but bepikir jua since lain kali kami punya turn lagi. Inda jua berani kan ketawakan, takut ketulahan. Sekalinya kalau ketawakan, kami pulang teruk ani bah, ijap ku nyanta, jauh palis~. Dalam pukul 4.00 atu barutah kana aga. Dalam kerita macam biasa ja, macam yang kamu buat selalu (pandai-pandai sendiri memikir). Balik rumah, makan maggi, lapas atu membuat tah ku post ani. Pakai ‘Microsoft Words’ pulang ku dulu tu, karang baru tah ku post dalam blog arah kazen ku, internet condemned bah di rumah, macam inda paham saja.

Atu ja lah, malas tah ku lagi kan membuat banyak-banyak, boring saja orang membaca. Kan besedia lagi, malam ani orang tahlil bah arah petuanku (lurus kah tu gelarannya? Arah rumah bini uncle ku bah). Mun baik respond orang aku mempost bahasa Brunei ani, ada tu lain kali ku buat lagi, mun inda, balik tah ku tu mempost ‘Bahasa Kapal’, anu bah, yang lacis-lacis bunyinya ah, mun paham bisai (lame tah banar~)